| ᠤᠷᠢᠶᠠᠩᠬᠠᠨ ᠤ᠂ ᠶᠤᠨᠳᠤᠨ | —ᠵᠡᠭᠦᠨ ᠦᠵᠦᠮᠦᠴᠢᠨ ᠤ ᠪᠦᠭᠡᠨᠡᠷ ᠤᠪᠤᠭᠠ ᠶᠢᠨ ᠲᠠᠬᠢᠯᠭᠠ ᠶᠢᠨ ᠨᠠᠶᠢᠷ ᠤᠨ ᠲᠡᠮᠳᠡᠭᠯᠡᠯ | ᠨᠠᠷᠠ ᠬᠤᠷᠠ ᠲᠡᠩᠴᠡᠭᠰᠡᠨ ᠲᠡᠯᠭᠡᠷ ᠵᠤᠨ ᠤ ᠤᠯᠠᠷᠢᠯ ᠨᠠᠮᠢᠷᠠᠭᠠ ᠪᠤᠷᠤᠭᠠᠨ ᠠᠮᠢᠰᠬᠤᠯᠠᠭᠰᠠᠨ ᠨᠠᠮᠤᠷ ᠤᠨ | ᠲᠡᠷᠢᠭᠦᠨ ᠰᠠᠷᠠ ᠶᠢᠨ ᠰᠢᠨᠡ ᠶᠢᠨ ᠶᠢᠰᠦᠨ ᠤ ᠦᠯᠵᠡᠶᠢᠳᠦ ᠰᠠᠶᠢᠬᠠᠨ ᠡᠳᠦᠷ᠂ ᠦᠵᠡᠮᠵᠢᠳᠦ ᠰᠦᠷᠯᠢᠭ ᠦᠨᠳᠦᠷ | ᠬᠠᠶᠢᠷᠬᠠᠨ ᠪᠤᠯᠬᠤ ᠪᠦᠭᠡᠨᠡᠷ ᠤᠪᠤᠭᠠ ᠶᠢᠨ ᠲᠠᠬᠢᠯᠭᠠ ᠶᠢᠨ ᠨᠠᠶᠢᠷ ᠪᠤᠯᠪᠠ᠃ ᠡᠨᠡ ᠵᠢᠯ ᠤᠨ ᠤᠪᠤᠭᠠᠨ ᠲᠠᠬᠢᠯᠭᠠ ᠶᠢ | ᠵᠡᠭᠦᠨ ᠦᠵᠦᠮᠦᠴᠢᠨ ᠤ ᠠᠯᠳᠠᠠᠬᠢᠯᠢ ᠰᠤᠮᠤᠨ ᠤ ᠪᠠᠳᠠᠷᠠᠬᠤ ᠪᠠᠷ ᠨᠤᠲᠤᠭᠳᠠᠢ ᠤᠷᠢᠶᠠᠩᠬᠠᠨ ᠤᠪᠤᠭᠳᠤ ᠶᠤᠨᠳᠤᠨ ᠤ | ᠰᠡᠷᠭᠦᠯᠡᠩᠪᠤᠯᠠᠭ᠂ ᠲᠤᠷᠵᠢ ᠶᠢᠨ ᠪᠠᠭᠠᠨᠠ ᠪᠤᠯᠤᠨ ᠪᠠᠶᠠᠠᠬᠦᠭᠡᠪᠦᠷ ᠤᠨ ᠡᠷᠬᠢᠮᠪᠠᠳᠤ ᠨᠠᠷ ᠲᠠᠭᠠᠭᠠᠴᠢᠯᠠᠨ ᠬᠢᠭᠰᠡᠨ | ᠪᠠᠶᠢᠨᠠ᠃ | ᠰᠢᠨᠡ ᠶᠢᠨ ᠨᠠᠢᠮᠠᠨ ᠤ ᠦᠷ ᠤᠨ ᠬᠠᠷᠠᠩᠭᠤᠢ ᠪᠠᠷ ᠰᠡᠷᠭᠦᠯᠡᠩᠪᠤᠯᠠᠭ ᠵᠡᠷᠭᠡ ᠲᠠᠬᠢᠯᠭᠠ ᠶᠢᠨ ᠠᠶᠢᠯ ᠤᠳ ᠭᠡᠷ | ᠡᠷᠦᠬᠡ ᠪᠠᠷ ᠴᠦᠪᠡᠩ ᠳᠤ ᠪᠠᠭᠤᠵᠦ᠂ ᠲᠠᠬᠢᠯᠭᠠ ᠶᠢᠨ ᠪᠡᠯᠡᠳᠭᠡᠯ ᠠᠵᠢᠯ ᠢᠶᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨᠡ᠃ ᠱᠠᠩ ᠶᠢᠨ | ᠮᠠᠯ᠂ ᠤᠶᠠᠭᠠᠨ ᠤ ᠮᠤᠷᠢ ᠪᠠᠨ ᠲᠡᠭᠡᠭᠡᠵᠦ ᠪᠠᠭᠤᠯᠭᠠᠬᠤ᠂ ᠮᠢᠬᠠ ᠰᠢᠭᠦᠰᠦ ᠴᠢᠨᠠᠬᠤ᠂ ᠲᠠᠬᠢᠯᠭᠠᠴᠢᠳ ᠲᠤ ᠬᠤᠭᠤᠯᠠ | ᠴᠠᠢ ᠬᠢᠵᠦ ᠦᠭᠬᠦ ᠵᠡᠷᠭᠡ ᠦᠢᠯᠡᠴᠢᠯᠡᠭᠡ ᠬᠢᠳᠡᠯ ᠳᠤ ᠶᠠᠭᠠᠷᠠᠤ ᠮᠦᠷᠳᠡᠭᠡᠨ ᠲᠠᠬᠢᠯᠭᠠ ᠶᠢᠨ ᠵᠦᠢᠯ ᠳᠤ ᠯᠠᠮᠠ ᠵᠠᠯᠠᠬᠤ᠂ | ᠤᠪᠤᠭᠠ ᠵᠠᠰᠠᠬᠤ᠂ ᠤᠷᠭᠠᠨ ᠬᠡᠶᠢᠮᠦᠷᠢ ᠪᠡᠯᠡᠳᠦᠬᠦ᠂ ᠰᠦᠯᠳᠡ ᠬᠡᠶᠢᠮᠦᠷᠯᠡᠬᠤ ᠵᠡᠷᠭᠡ ᠠᠵᠢᠯ ᠶᠢ ᠱᠠᠯᠠᠪᠳᠠᠨᠠ᠃ | ᠡᠳᠡᠨᠡᠶᠢᠬᠢᠨ ᠤᠪᠤᠭᠠ ᠠᠴᠠ ᠲᠠᠪᠤ ᠵᠢᠷᠭᠤᠭᠠᠨ ᠵᠠᠭᠤᠨ ᠭᠠᠵᠠᠷ ᠵᠠᠶᠢᠳᠠᠢ ᠪᠠᠶᠢᠳᠠᠭ᠃ ᠪᠢ ᠪᠠᠰᠠ ᠬᠦᠪᠡᠭᠦᠨ | ᠰᠡᠷᠭᠦᠯᠡᠩᠪᠤᠯᠠᠭ ᠤᠨ ᠤᠪᠤᠭᠠ ᠲᠠᠬᠢᠬᠤ ᠶᠢ ᠲᠤᠬᠢᠶᠠᠯᠳᠤᠭᠤᠯᠤᠨ᠂ ᠨᠢᠭᠡᠨ ᠴᠢᠯᠠᠭᠤᠨ ᠢᠯᠡᠷᠬᠡᠶᠢᠯᠡᠯ ᠬᠢᠯᠭᠡᠵᠦ | ᠡᠷᠭᠦᠭᠰᠡᠨ ᠪᠠᠶᠢᠭᠠ ᠶᠤᠮ᠃ ᠡᠨᠡ ᠪᠤᠯ ᠮᠢᠨᠤ ᠦᠨᠳᠦᠷ ᠲᠡᠭᠡᠳᠦ ᠤᠳ ᠲᠤ ᠡᠷᠬᠦᠬᠦ ᠦᠨᠡᠨᠴᠢ ᠰᠦᠰᠦᠭ ᠤᠨ ᠮᠠᠨᠢ | ᠢᠯᠡᠷᠡᠭᠦᠯᠦᠯ ᠪᠤᠯᠭᠠᠪᠠ᠃ ᠲᠡᠷᠡ ᠢᠯᠡᠷᠬᠡᠶᠢᠯᠡᠯ ᠳᠤ ︽ᠪᠦᠭᠡᠨᠡᠷ ᠤᠪᠤᠭᠠ︾ ᠭᠡᠵᠦ ᠲᠤᠮᠤ ᠦᠰᠦᠭ ᠢᠶᠠᠷ | ᠲᠤᠲᠤᠷᠠᠭᠤᠯᠵᠦ᠂ ᠬᠤᠶᠠᠷ ᠲᠠᠯᠠ ᠳᠤᠨᠢ ᠬᠠᠳᠤᠨ ᠡᠬᠡ ᠶᠢᠨ ︽ᠤᠮᠤᠭ ᠦᠭᠡᠢ ᠤᠳᠤᠭ ᠭᠡᠵᠦ ᠪᠠᠶᠢᠳᠠᠭ ᠦᠭᠡᠢ᠂ | ᠤᠳᠤᠭ ᠤᠨ ᠡᠷᠬᠢᠮ ᠵᠦᠢᠯᠡᠰ ᠨᠢ ᠤᠪᠤᠭᠠ ᠪᠤᠯᠤᠮᠤᠢ᠂ ᠤᠪᠤᠭᠠ ᠤᠳᠤᠭ ᠢ ᠮᠠᠨᠠᠵᠦ ᠪᠠᠶᠢᠨᠠᠮ᠂ ᠤᠪᠤᠭᠠ ᠭᠡᠳᠡᠭ | ᠨᠢ ᠨᠤᠲᠤᠭ ᠤᠨ ᠲᠠᠮᠠᠭᠠ ᠪᠤᠯᠠᠢ︾ ᠭᠡᠬᠦ ᠠᠶᠢᠯᠠᠳᠬᠠᠯ ᠢ ᠤᠯᠠᠮᠵᠢᠯᠠᠨ ᠮᠦᠩᠬᠡᠯᠡᠪᠡᠢ᠃ ᠢᠯᠡᠷᠬᠡᠶᠢᠯᠡᠯ ᠤᠨ ᠠᠷᠤ | ᠲᠠᠯᠠ ᠳᠤ᠄ | ︽ᠪᠦᠭᠡᠨᠡᠷ ᠠᠶᠢᠮᠠᠭ ᠪᠤᠯᠪᠠᠰᠣ ᠴᠠᠭᠠᠳᠠᠢ ᠪᠦᠬᠡ ᠶᠢᠨ ᠤᠳᠤᠮ ᠭᠡᠯᠴᠡᠳᠡᠭ ᠤᠷᠢᠶᠠᠩᠬᠠᠨ ᠤᠪᠤᠭ ᠤᠨ | ᠵᠠᠷᠴᠠᠭᠤᠳᠠᠢ ᠶᠢᠨ ᠵᠠᠯᠮᠠ ᠵᠠᠩᠵᠤᠨ ᠤ ᠬᠤᠶᠢᠴᠢᠰ ᠪᠤᠯᠠᠢ᠃ 17 ᠳ᠋ᠤᠭᠠᠷ ᠵᠠᠭᠤᠨ ᠤ ᠰᠡᠭᠦᠯᠴᠢ ᠪᠠᠷ ᠠᠷᠤ ᠬᠠᠩᠭᠠᠢ | ᠠᠭᠤᠯᠠᠨ ᠠᠴᠠ ᠭᠠᠯᠳᠠᠨ᠂ ᠴᠤᠭᠳᠤ ᠬᠡᠮᠡᠬᠦ ᠠᠬᠠ ᠲᠡᠭᠦᠤ ᠬᠤᠶᠠᠭᠤᠯᠠ ᠦᠵᠦᠮᠦᠴᠢᠨ ᠨᠤᠲᠤᠭ ᠲᠤᠷ ᠨᠡᠭᠦᠨ | ᠢᠷᠡᠵᠦ᠂ ᠯᠠᠮᠠ ᠶᠢᠨ ᠬᠦᠷᠢᠶᠡ ᠰᠦᠮᠡ ᠶᠢᠨ ᠬᠠᠷᠢᠶᠠᠳᠤ ᠪᠦᠭᠡᠨᠡᠷ ᠬᠤᠷᠢᠨ ᠪᠤᠯᠤᠨ ᠨᠤᠲᠤᠭᠰᠢᠯᠤᠭᠠ᠃ ᠴᠠᠭᠠᠨ | ᠰᠦᠯᠳᠡᠳᠦ ᠬᠠᠰᠢᠶᠠᠳᠤ ᠶᠢᠨ ᠪᠡᠶᠡᠨ ᠤᠪᠤᠭᠠ ᠶᠢ ᠪᠤᠰᠬᠠᠨ ᠲᠠᠬᠢᠵᠦ ᠤᠳᠤᠮ ᠤᠭᠰᠠᠭᠠ ᠦᠶᠡ ᠤᠯᠠᠮᠵᠢᠯᠠᠭᠰᠠᠨ | ᠢᠶᠠᠷ ᠲᠠᠶᠠᠭᠠᠷ ᠲᠤ ︽ᠪᠦᠭᠡᠨᠡᠷ ᠤᠪᠤᠭᠠ︾ ᠬᠡᠮᠡᠨ ᠠᠯᠳᠠᠷᠰᠢᠪᠠᠢ᠃ | ᠪᠦᠬᠡ ᠮᠦᠷᠭᠦᠯ ᠤᠨ ᠢᠵᠠᠭᠤᠷ ᠡᠷᠳᠡᠮᠳᠦ ᠲᠡᠭᠡᠳᠦ ᠶᠢᠨ ᠰᠦᠷ ᠭᠡᠷᠡᠯ ᠳᠤᠷ ᠰᠢᠳᠦᠵᠦ ᠲᠤᠰ ᠢᠯᠡᠷᠬᠡᠶᠢᠯᠡᠯ | ᠢᠶᠠᠷ ᠲᠤᠲᠤᠷᠬᠠᠶᠢᠯᠠᠵᠦ ᠪᠠᠶ᠋ᠰᠬᠠᠨ ᠮᠦᠩᠬᠡᠯᠡᠮᠦᠢ︕ | ᠤᠷᠢᠶᠠᠩᠬᠠᠨ ᠤ᠂ ᠶᠤᠨᠳᠤᠨ ᠡᠷᠭᠦᠪᠡ | 2019,08,09︾ ᠭᠡᠵᠦ ᠪᠢᠴᠢᠭᠯᠡᠨ᠂ ᠲᠤᠰ ᠤᠪᠤᠭᠠᠨ ᠤ ᠡᠭᠦᠰᠦᠯ ᠢᠵᠠᠭᠤᠷ ᠶᠢ ᠲᠤᠲᠤᠷᠠᠭᠤᠯᠤᠨ ᠲᠤᠷᠠᠰᠬᠠᠯ | ᠪᠤᠯᠭᠠᠭᠰᠠᠨ ᠪᠠᠶᠢᠭᠠ ᠶᠤᠮ᠃ ᠰᠡᠷᠭᠦᠯᠡᠩᠪᠤᠯᠠᠭ᠂ ᠪᠠᠭᠠᠨᠠ᠂ ᠡᠷᠬᠢᠮᠪᠠᠳᠤ ᠵᠡᠷᠭᠡ ᠲᠠᠬᠢᠯᠭᠠ ᠶᠢᠨ ᠲᠠᠭᠠᠭᠠᠮᠠᠯ ᠨᠠᠷ | ᠨᠢᠭᠡᠨ ᠲᠤᠮᠤ ᠲᠠᠬᠢᠯᠭᠠ ᠶᠢᠨ ᠴᠢᠯᠠᠭᠤᠨ ᠰᠢᠷᠡᠭᠡ ᠪᠤᠯᠤᠨ ᠬᠤᠶᠠᠷ ᠭᠡᠰᠡᠭ ᠤᠳᠤᠯᠭᠠ ᠶᠢᠨ ᠱᠠᠩᠯᠤ ᠡᠷᠭᠦᠭᠰᠡᠨ ᠨᠢ | ᠪᠠᠰᠠ ᠨᠢᠬᠡᠨ ᠰᠠᠶᠢᠬᠠᠨ ᠦᠨᠢᠳᠡ ᠶᠢᠨ ᠬᠡᠷᠡᠭᠯᠡᠭᠡᠨ ᠤ ᠴᠢᠮᠡᠭ ᠲᠤᠷᠠᠰᠬᠠᠯ ᠪᠤᠯᠭᠠᠭᠰᠠᠨ ᠨᠢ ᠰᠠᠬᠢᠭᠤᠰᠤ ᠶᠢᠨ ᠲᠠᠭᠠᠯᠠᠯ | ᠤᠯᠠᠨ ᠤ ᠰᠠᠶᠢᠰᠢᠶᠠᠯ ᠢ ᠤᠯᠬᠤ ᠨᠢ ᠯᠠᠪᠳᠠᠢ ᠶᠤᠮ᠃ | ᠲᠠᠬᠢᠯᠭᠠ ᠶᠢᠨ ᠦᠷᠯᠦᠭᠡ ᠡᠷᠳᠡ ᠪᠢᠳᠡᠭᠦᠤ ᠡᠭᠦᠯᠡ ᠲᠠᠢ᠂ ᠠᠯᠤᠰ ᠢᠶᠠᠷ ᠪᠤᠷᠤᠭᠠᠨ ᠤ ᠡᠭᠦᠯᠡᠰ ᠡᠪᠬᠡᠷᠡᠨᠡ᠃ | ᠲᠠᠯᠠᠢ ᠶᠢᠨ ᠲᠦᠪᠰᠢᠨ ᠠᠴᠠ ᠲᠡᠭᠡᠭᠰᠢ 1171 ᠦᠨᠳᠦᠷᠯᠢᠭ ᠲᠤ ᠡᠷᠭᠦᠭᠳᠡᠵᠦ ᠪᠠᠶᠢᠭᠠ ᠪᠦᠭᠡᠨᠡᠷ ᠤᠪᠤᠭᠠ ᠮᠠᠨᠢ | ᠴᠠᠭᠠᠨ ᠲᠤᠭ ᠰᠦᠯᠳᠡ ᠪᠠᠷ ᠬᠡᠶᠢᠮᠦᠷᠯᠠᠭᠤᠯᠵᠦ᠂ ᠲᠠᠪᠤᠨ ᠦᠩᠭᠡ ᠶᠢᠨ ᠤᠷᠭᠠᠨ ᠬᠡᠶᠢᠮᠦᠷᠢ ᠪᠤᠯᠤᠨ ᠵᠡᠯᠡ ᠬᠡᠶᠢᠮᠦᠷᠢ | ᠲᠠᠳᠠᠭᠰᠠᠨ ᠢᠶᠠᠷ ᠰᠦᠷ ᠵᠢᠪᠬᠤᠭᠠᠳᠠᠢ ᠬᠠᠷᠠᠭᠳᠠᠨᠠ᠃ ᠠᠭᠤᠯᠠᠨ ᠤᠷᠤᠢ ᠳᠤ ᠭᠠᠷᠤᠬᠤᠶᠠ ᠤᠯᠠᠨ ᠠᠭᠤᠯᠠᠰ | ᠵᠢᠵᠢᠭᠷᠡᠵᠦ᠂ ᠠᠭᠤᠳᠠᠮ ᠲᠠᠯᠠ ᠶᠢᠨ ᠭᠤᠪᠢ ᠬᠤᠭᠤᠯᠠᠢ ᠪᠠᠷ ᠦᠶᠡ ᠦᠶᠡ ᠵᠦᠭᠡᠯᠡᠨ ᠬᠤᠷᠠ ᠴᠠᠶᠢᠷᠳᠠᠨᠠ᠃ | ᠪᠢᠳᠡ ᠭᠤᠴᠢᠨ ᠠᠯᠬᠤᠮ ᠶᠢᠨ ᠵᠠᠢ ᠠᠴᠠ ᠪᠡᠶᠡ ᠪᠠᠨ ᠠᠷᠢᠭᠤᠯᠠᠵᠦ ᠤᠪᠤᠭᠠᠨ ᠳᠠᠭᠠᠨ ᠭᠠᠷᠤᠯᠠ᠃ ᠤᠪᠤᠭᠠᠨ | ᠲᠠᠭᠠᠭᠠᠮᠠᠯ ᠨᠠᠷ ᠰᠢᠨᠡ ᠰᠦᠮᠡ ᠶᠢᠨ ᠯᠠᠮᠠᠳᠠᠨ ᠪᠠᠭᠠᠳᠤᠷ ᠢ ᠵᠠᠯᠠᠭᠰᠠᠨ ᠢᠶᠠᠷ ᠲᠡᠷᠡ ᠲᠠᠬᠢᠯᠭᠠ ᠶᠢᠨ ᠵᠢᠷᠤᠮ ᠢᠶᠠᠷ | ᠶᠠᠪᠤᠭᠤᠯᠪᠠ᠃ ᠲᠠᠬᠢᠯᠭᠠ ᠶᠢᠨ ᠰᠠᠩ ᠤᠩᠰᠢᠬᠤ ᠶᠢᠨ ᠲᠤᠮᠳᠠ ᠠᠷᠴᠠ ᠰᠠᠩ ᠲᠠᠯᠪᠢᠬᠤ᠂ ᠲᠠᠬᠢᠯᠭᠠ ᠶᠢᠨ | ᠵᠦᠢᠯᠳᠡ ᠶᠢ ᠦᠷᠦᠬᠦ᠂ ᠵᠤᠯᠠ ᠪᠠᠷᠢᠬᠤ᠂ ᠡᠷᠭᠦᠯ ᠰᠠᠴᠤᠯᠢ ᠬᠢᠯᠭᠡᠬᠦ᠂ ᠲᠠᠯᠠᠯᠭᠠ ᠠᠪᠬᠤ ᠰᠦᠰᠦᠭᠯᠡᠨ ᠮᠦᠷᠬᠦᠬᠦ | ᠵᠡᠷᠭᠡ ᠵᠠᠩ ᠦᠢᠯᠡ ᠶᠢᠨ ᠲᠡᠰ ᠲᠠᠷᠠᠭᠠ ᠪᠠᠷ ᠬᠢᠭᠳᠡᠵᠡᠢ᠃ ᠲᠤᠰᠬᠠᠢ ᠴᠠᠭᠠᠨ ᠢᠳᠡᠭᠡᠨ ᠪᠠᠷ ᠵᠠᠰᠠᠭᠰᠠᠨ ᠲᠠᠪᠠᠭ ᠲᠠᠢ | ᠵᠦᠢᠯᠡᠰ ᠶᠢ ᠴᠢᠯᠠᠭᠤᠨ ᠰᠢᠷᠡᠭᠡᠨᠡ ᠲᠠᠯᠪᠢᠵᠦ ᠡᠷᠭᠦᠭᠡᠳ᠂ ᠪᠠᠰᠠ ᠰᠦᠨ ᠰᠠᠴᠤᠯᠢ ᠪᠠᠷ ᠤᠪᠤᠭᠠ ᠪᠠᠨ ᠲᠤᠭᠤᠷᠢᠨ | ᠡᠷᠭᠦᠪᠡ᠂ ᠪᠢ ᠬᠤᠶᠠᠷ ᠪᠠᠭᠠ ᠠᠴᠢ ᠬᠦᠤ ᠠᠵᠠᠵᠠᠶᠠᠭᠠ᠂ ᠡᠯᠪᠡᠭᠪᠠᠶᠠᠷ ᠢᠶᠠᠨ ᠲᠠᠭᠠᠭᠤᠯᠵᠦ᠂ ᠤᠪᠤᠭᠠᠨ ᠳᠠᠭᠠᠨ | ᠲᠠᠨᠢᠭᠤᠯᠵᠦ᠂ ᠡᠷᠭᠦᠯ ᠲᠠᠭᠠᠳᠬᠠᠯ ᠬᠢᠬᠦ ᠶᠤᠰᠤᠨ ᠶᠢ ᠦᠵᠡᠭᠦᠯᠦᠭᠰᠡᠨ ᠪᠦᠭᠡᠳ ᠬᠢᠯᠭᠡᠭᠰᠡᠨ ᠪᠠᠶᠢᠭᠠ ᠶᠤᠮ᠃ ᠡᠨᠡ | ᠪᠤᠯ ᠲᠠᠷᠤᠢ ᠤᠯᠠᠮᠵᠢᠯᠠᠯ ᠭᠡᠵᠦ ᠪᠢ ᠲᠤᠲᠤᠷᠠ ᠪᠠᠨ ᠪᠤᠳᠤᠬᠤ ᠪᠦᠭᠡᠳ ᠲᠡᠳᠡᠨ ᠤᠨ ᠨᠢᠯᠬᠠ ᠲᠠᠷᠢᠬᠢᠨ ᠳᠤ | ᠰᠠᠭᠤᠭᠳᠠᠬᠤ ᠶᠢ ᠬᠦᠰᠡᠨ ᠪᠦᠯᠦᠭᠡ᠃ | ᠤᠯᠠᠨ ᠮᠦᠷᠭᠦᠯᠴᠢᠳ ᠲᠡᠷᠭᠡ ᠲᠠᠢ᠂ ᠮᠤᠲ᠋ᠤᠷ ᠲᠠᠢ ᠢᠷᠡᠵᠦ ᠮᠦᠷᠭᠦᠯ ᠲᠠᠭᠠᠳᠬᠠᠯ ᠢᠶᠠᠨ ᠬᠢᠵᠦ ᠪᠤᠴᠠᠨᠠ᠃ | ᠲᠠᠬᠢᠯᠭᠠ ᠶᠢᠨ ᠶᠤᠰᠤᠨ ᠲᠠᠭᠤᠰᠤᠭᠰᠠᠨ ᠤ ᠲᠠᠷᠠᠭᠠ᠂ ᠲᠦᠷᠪᠡ ᠲᠠᠪᠤᠨ ᠪᠦᠭᠡ ᠦᠳᠦᠳᠦ ᠲᠢᠳᠠᠮ ᠢᠶᠠᠨ ᠲᠠᠯᠪᠢᠵᠦ | ᠢᠵᠠᠭᠤᠷ ᠬᠤᠪᠴᠠᠰᠤ ᠵᠠᠰᠠᠯ ᠢᠶᠠᠨ ᠭᠡᠳᠦᠷᠴᠦ᠂ ᠲᠠᠯᠠ ᠬᠡᠩᠭᠡᠷᠭᠡ ᠪᠠᠨ ᠪᠠᠷᠢᠨ ᠢᠷᠡᠵᠦ᠂ ᠤᠪᠤᠭᠠᠨ ᠳᠤ ᠲᠠᠬᠢᠯᠭᠠ | ᠲᠠᠭᠠᠳᠬᠠᠯ ᠬᠢᠬᠦ ᠨᠢ ᠪᠠᠰᠠ ᠨᠢᠭᠡᠨ ᠰᠤᠨᠢᠷᠬᠠᠯᠳᠠᠢ ᠤᠯᠠᠮᠵᠢᠯᠠᠯ ᠤᠨ ᠢᠵᠠᠭᠤᠷ ᠶᠤᠰᠤᠨ ᠭᠡᠯᠳᠡᠢ᠃ ᠪᠦᠭᠡᠨᠡᠷ ᠤᠪᠤᠭᠠ | ᠪᠤᠯ ᠡᠷᠳᠡᠨ ᠤ ᠤᠯᠠᠮᠵᠢᠯᠠᠯᠳᠤ ᠲᠠᠬᠢᠯᠭᠠᠳᠤ ᠤᠪᠤᠭᠠ ᠪᠤᠯᠬᠤᠷ ᠡᠶᠢᠮᠦ ᠬᠡᠯᠪᠡᠷᠢ ᠪᠠᠷ ᠲᠠᠬᠢᠬᠤ ᠨᠢ ᠵᠦᠢᠳᠡᠢ ᠭᠡᠬᠦ | ᠰᠠᠨᠠᠭᠠ ᠪᠤᠳᠤᠯ ᠨᠠᠳᠠ ᠳᠤ ᠡᠷᠬᠡ ᠦᠭᠡᠢ ᠲᠦᠷᠦᠭᠳᠡᠨᠡ᠃ ᠡᠨᠡ ᠦᠶᠡ ᠪᠢ ᠪᠠᠰᠠ ᠦᠪᠡᠷ ᠶᠢᠨ ᠤᠪᠤᠭᠠᠨ ᠳᠠᠭᠠᠨ | ᠡᠷᠬᠦᠬᠦ ︽ᠦᠴᠢᠯ ᠰᠠᠩ︾ ᠢᠶᠠᠨ ᠤᠩᠰᠢᠭᠰᠠᠨ ᠢᠶᠠᠨ ᠤᠪᠤᠭᠠᠨ ᠤ ᠴᠠᠭᠠᠨ ᠰᠦᠯᠳᠡ ᠶᠢᠨ ᠲᠤᠬᠠᠢ ᠰᠢᠨᠵᠢᠯᠡᠭᠡᠨ ᠤ | ᠦᠭᠦᠯᠡᠯ ᠪᠠ ᠬᠠᠳᠠᠭ ᠤᠨ ᠬᠠᠮᠳᠤ ᠤᠪᠤᠭᠠᠨ ᠳᠠᠭᠠᠨ ᠨᠠᠨᠳᠢᠩᠨᠠᠨ ᠡᠷᠭᠦᠪᠡ᠃ ᠲᠤᠰ ᠤᠪᠤᠭᠠ ᠬᠤᠶᠠᠷ ᠭᠡᠰᠡᠭ | ᠲᠠᠬᠢᠯᠭᠠ ᠶᠢᠨ ᠶᠤᠰᠤᠨ ᠲᠠᠢ᠂ ᠨᠢᠭᠡ ᠨᠢ ᠡᠨᠡ ᠭᠤᠤᠯ ᠤᠪᠤᠭᠠᠨ ᠲᠠᠬᠢᠯᠭᠠ᠂ ᠨᠦᠬᠦᠭᠡ ᠨᠢ ᠵᠡᠭᠦᠨ ᠬᠤᠶᠢᠳᠦ | ᠲᠤᠤᠷᠠ ᠪᠠᠶᠢᠬᠤ ︽ᠬᠡᠤᠬᠡᠳ ᠤᠨ ᠤᠪᠤᠭᠠ︾ ᠪᠤᠯᠤᠨᠠ᠃ ᠭᠤᠤᠯ ᠤᠪᠤᠭᠠᠨ ᠤᠨ ᠪᠠᠷᠠᠭᠤᠨ ᠳᠠᠬᠢ ᠵᠡᠷᠭᠡᠴᠡᠭᠡ | ᠦᠨᠳᠦᠷᠯᠢᠭ ᠲᠤ ᠮᠠᠨ ᠤ ᠡᠪᠦᠭᠡ ᠠᠪᠤ ᠶᠢᠨ ᠭᠠᠷᠳᠠᠭ ᠪᠠᠰᠠ ᠨᠢᠭᠡᠨ ᠵᠢᠵᠢᠭ ᠤᠪᠤᠭᠠ ᠪᠤᠢ᠃ ᠤᠯᠠᠨ ᠲᠡᠮᠦᠷ | ᠲᠤᠤᠷ ᠢᠶᠠᠷ ᠬᠦᠷᠢᠶᠡᠯᠡᠭᠰᠡᠨ ᠪᠤᠯᠬᠤᠷ ᠤᠷᠤᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠠᠯᠤᠰ ᠠᠴᠠ ᠰᠠᠩ ᠤᠳᠤᠯᠭᠠ ᠲᠠᠯᠪᠢᠵᠦ | ᠴᠠᠭᠠᠨ ᠰᠦᠨ ᠤ ᠰᠠᠴᠤᠯᠢ ᠡᠷᠭᠦᠭᠰᠡᠨ ᠢᠶᠠᠨ ︽ᠬᠡᠤᠬᠡᠳ ᠤᠨ ᠤᠪᠤᠭᠠ︾ ᠢ ᠴᠢᠭᠯᠡᠯᠡ᠃ ᠬᠡᠤᠬᠡᠳ ᠤᠨ ᠤᠪᠤᠭᠠ ᠢ | ᠪᠠᠰᠠ ᠲᠠᠬᠢᠯᠭᠠ ᠲᠠᠢ ᠪᠤᠯᠬᠤᠷ ︽ᠤᠩᠭᠤᠨ ᠲᠤᠪᠤᠭ︾ ᠴᠤ ᠭᠡᠳᠡᠭ᠃ ᠲᠤᠰ ᠲᠤᠪᠤᠭ ᠶᠢᠨ ᠤᠷᠤᠢ ᠳᠤ ᠭᠤᠤᠯ | ᠤᠪᠤᠭᠠ᠂ ᠬᠤᠶᠠᠷ ᠱᠠᠪᠢ ᠤᠪᠤᠭᠠ ᠲᠠᠢ ᠭᠤᠷᠪᠠᠨ ᠭᠡᠰᠡᠭ ᠤᠪᠤᠭᠠ ᠪᠤᠢ᠃ ᠮᠠᠨ ᠤ ᠬᠡᠳᠦᠡ ᠭᠡᠷ ᠶᠢᠨ ᠲᠤᠯᠤᠭᠠᠨ | ᠠᠴᠢᠨᠠᠷ ᠬᠤᠶᠢᠴᠢᠰ ᠤᠷᠤᠯᠴᠠᠨ᠂ ᠤᠪᠤᠭᠠᠨ ᠳᠠᠭᠠᠨ ᠲᠠᠬᠢᠯ ᠡᠷᠭᠦᠵᠦ᠂ ᠲᠠᠭᠠᠳᠬᠠᠯ ᠬᠢᠭᠰᠡᠨ ᠪᠠᠶᠢᠭᠠ᠂ ᠲᠡᠳᠡᠨ ᠤ | ᠪᠠᠨ ᠡᠷᠡᠭᠦᠯ ᠰᠠᠷᠠᠭᠤᠯ ᠦᠰᠴᠦ ᠪᠤᠶᠢᠵᠢᠬᠤ ᠪᠠ ᠬᠦᠮᠦᠨ ᠤ ᠶᠢᠷᠳᠢᠨᠴᠤ ᠳᠤ ᠬᠡᠷᠡᠭᠴᠡᠭᠡ ᠲᠠᠢ ᠰᠠᠶᠢᠨ ᠰᠠᠶᠢᠬᠠᠨ | ᠶᠠᠪᠤᠬᠤ ᠶᠢ ᠲᠡᠭᠡᠳᠦ ᠶᠢᠨ ᠰᠦᠷ ᠤᠪᠤᠭᠠᠨ ᠰᠠᠬᠢᠭᠤᠰᠤ ᠲᠠᠭᠠᠨ ᠲᠠᠭᠠᠳᠬᠠᠨᠠᠮ᠃ | | ᠤᠪᠤᠭᠠᠨ ᠨᠠᠶᠢᠷ ᠤᠨ ᠪᠦᠬᠡ ᠶᠢᠨ ᠪᠠᠷᠢᠯᠳᠤᠭᠠᠨ ᠤ ᠲᠡᠭᠡᠳᠦ ᠲᠦᠷᠪᠡ ᠳᠤ ᠵᠢᠷᠠᠠᠪᠤᠯᠠᠭ ᠢᠶᠠᠷ ᠨᠤᠲᠤᠭᠳᠠᠢ | ᠤᠯᠤᠰ ᠤᠨ ᠠᠪᠤᠷᠭᠤ ᠵᠠᠮᠪᠠᠯ ᠤᠨ ᠠᠮᠤᠷᠰᠠᠨᠠᠭᠠ᠂ ᠮᠤᠩᠭᠤᠯ ᠤᠯᠤᠰ ᠤᠨ ᠠᠶᠢᠮᠠᠭ ᠤᠨ ᠬᠤᠷᠴᠠ ᠠᠷᠰᠯᠠᠨ | ᠨᠤᠮᠢᠨᠳᠠᠯᠠᠢ᠂ ᠤᠯᠤᠰ ᠤᠨ ᠠᠪᠤᠷᠭᠤ ᠪᠠᠶᠠᠠᠬᠦᠭᠡᠪᠦᠷ ᠶᠢᠨ ᠪᠠᠶᠠᠠᠪᠠᠳᠤ᠂ ᠤᠯᠢᠶᠠᠰᠤᠳᠠᠢ ᠶᠢᠨ ᠠᠯᠳᠠᠠᠸᠠᠴᠢᠷ ᠨᠠᠷ | ᠦᠯᠡᠳᠡᠵᠦ᠂ ᠠᠮᠤᠷᠰᠠᠨᠠᠭᠠ ᠪᠠᠶᠠᠠᠪᠠᠳᠤ ᠪᠠᠷ᠂ ᠨᠤᠮᠢᠨᠳᠠᠯᠠᠢ ᠠᠯᠳᠠᠠᠸᠠᠴᠢᠷ ᠢᠶᠠᠷ ᠲᠤᠰ ᠲᠤᠰ ᠲᠠᠪᠠᠵᠦ᠂ ᠲᠡᠷᠢᠭᠦᠨ | ᠲᠡᠳ᠋ ᠳᠤ ᠠᠮᠤᠷᠰᠠᠨᠠᠭᠠ ᠨᠤᠮᠢᠠᠳᠠᠯᠠᠢ ᠶᠢ ᠬᠠᠶᠠᠵᠦ᠂ ᠨᠠᠶᠢᠷ ᠤᠨ ᠱᠠᠩ ᠭᠦᠷᠳᠡᠪᠡ᠃ | ᠲᠠᠬᠢᠯᠭᠠ ᠶᠢᠨ ᠨᠠᠶᠢᠷ ᠲᠤ ᠡᠯᠡ ᠰᠤᠮᠤ ᠪᠠᠯᠭᠠᠰᠤᠨ ᠤ ᠤᠶᠠᠭᠠᠴᠢᠳ ᠴᠤᠭᠯᠠᠷᠠᠨ ᠲᠦᠴᠢ ᠭᠠᠷᠤᠢ ᠮᠤᠷᠢᠳ | ᠤᠷᠤᠯᠴᠠᠵᠦ᠂ ᠭᠤᠴᠢ ᠭᠠᠷᠤᠢ ᠭᠠᠵᠠᠷ ᠶᠢᠨ ᠠᠯᠤᠰ ᠠᠴᠠ ᠲᠠᠯᠪᠢᠵᠠᠢ᠃ ᠬᠤᠷᠳᠤᠨ ᠮᠤᠷᠢᠨ ᠤ ᠤᠷᠤᠯᠳᠤᠭᠠᠨ ᠳᠤ᠂ | ᠪᠠᠶᠠᠠᠬᠦᠭᠡᠪᠦᠷ ᠤᠨ ᠵᠢᠷᠠᠨᠳᠠᠢ ᠶᠢᠨ ᠨᠤᠭᠤᠭᠠᠨ ᠬᠠᠷᠠ ᠮᠤᠷᠢ ᠲᠠᠰᠤᠷᠠᠨ ᠲᠡᠷᠢᠭᠦᠯᠡᠵᠦ᠂ ᠡᠭᠡᠪᠤᠯᠠᠭ ᠤᠨ | ᠲᠡᠯᠭᠡᠷᠡᠩᠬᠦᠢ ᠶᠢᠨ ᠭᠡᠬᠡᠷ ᠮᠤᠷᠢ ᠠᠮᠠᠨ ᠬᠦᠵᠦᠭᠦᠯᠡᠵᠦ᠂ ᠵᠢᠷᠠᠠᠪᠤᠯᠠᠭ ᠤᠨ ᠮᠦᠩᠬᠡᠵᠠᠭᠠᠨ ᠤ ᠬᠡᠭᠡᠷ ᠮᠤᠷᠢ | ᠭᠤᠳᠠᠭᠠᠷᠯᠠᠨ᠂ ᠪᠠᠶᠠᠠᠬᠦᠭᠡᠪᠦᠷ ᠤᠨ ᠢᠳᠡᠮᠵᠠᠪ ᠤᠨ ᠬᠦᠷᠡᠩ ᠮᠤᠷᠢ ᠲᠦᠳᠡᠭᠡᠷᠯᠡᠵᠦ᠂ ᠲᠠᠭᠤᠳᠤᠨᠠᠭᠤᠷ ᠤᠨ | ᠬᠠᠰᠪᠠᠭᠠᠳᠤᠷ ᠤᠨ ᠬᠡᠭᠡᠷ ᠮᠤᠷᠢ ᠠᠶᠢᠷᠠᠭ ᠶᠢᠨ ᠲᠠᠪᠤ ᠲᠤ ᠢᠷᠡᠵᠦ᠂ ᠨᠠᠶᠢᠷᠴᠢᠳ ᠤᠯᠠᠨ ᠤ ᠮᠡᠯᠮᠡᠢ ᠶᠢ ᠪᠠᠶᠠᠰᠬᠠᠨ᠂ | ᠴᠤᠯᠠ ᠪᠠᠨ ᠲᠠᠭᠤᠳᠠᠭᠤᠯᠵᠦ ᠡᠵᠡᠨ ᠢᠶᠠᠨ ᠪᠠᠶᠠᠷᠯᠠᠭᠤᠯᠤᠭᠠᠳ ᠨᠠᠶᠢᠷ ᠤᠨ ᠱᠠᠩ ᠪᠠᠨ ᠲᠤᠰᠤᠨᠠ᠃ ᠱᠠᠩ | ᠭᠦᠷᠳᠡᠭᠰᠡᠨ ᠬᠦᠯᠦᠭ ᠤᠳ ᠲᠤ᠄ ᠪᠠᠶᠠᠠᠬᠦᠭᠡᠪᠦᠷ ᠤᠨ ᠲᠡᠮᠦᠷᠪᠠᠭᠠᠳᠤᠷ ᠤᠨ ᠰᠠᠷᠠᠯ᠂ ᠪᠠᠳᠠᠷᠠᠬᠤ ᠶᠢᠨ ᠰᠠᠶᠢᠠᠪᠠᠶᠠᠷ ᠤᠨ | ᠬᠡᠭᠡᠷ᠂ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠤ ᠭᠠᠩᠳᠡᠮᠦᠷ ᠤᠨ ᠬᠠᠯᠢᠭᠤᠨ᠂ ᠤᠳᠬᠠᠨᠪᠠᠶᠠᠷ ᠤᠨ ᠬᠡᠭᠡᠷ᠂ ᠪᠠᠶᠠᠨ ᠴᠠᠭᠠᠨ ᠤ | ᠪᠠᠯᠳᠠᠨ ᠤ ᠬᠠᠷᠠ᠂ ᠪᠡᠶᠡᠡᠬᠦᠭᠡᠪᠦᠷ ᠤᠨ ᠢᠳᠡᠮᠵᠠᠪ ᠤᠨ ᠠᠯᠠᠭ᠂ ᠪᠠᠶᠠᠨ ᠴᠠᠭᠠᠨ ᠤ ᠬᠤᠪᠢᠰᠬᠠᠯᠳᠤ ᠶᠢᠨ ᠬᠦᠷᠡᠩ᠂ | ᠲᠠᠭᠤᠳᠤᠨᠠᠭᠤᠷ ᠤᠨ ᠲᠦᠮᠡᠨᠨᠠᠰᠤᠳᠤ ᠶᠢᠨ ᠰᠠᠷᠠᠯ᠂ ᠪᠡᠶᠡᠡᠬᠦᠭᠡᠪᠦᠷ ᠤᠨ ᠡᠷᠳᠡᠨᠢᠪᠠᠭᠠᠳᠤᠷ ᠤᠨ ᠬᠠᠷᠠ᠂ | ᠬᠦᠪᠴᠢᠠᠭᠤᠪᠢ ᠶᠢᠨ ᠰᠦᠯᠳᠡ ᠶᠢᠨ ᠪᠤᠭᠤᠷᠤᠯ᠂ ᠪᠠᠶᠠᠠᠬᠦᠭᠡᠪᠦᠷ ᠤᠨ ᠬᠦᠷᠡᠯ ᠤᠨ ᠪᠤᠷᠤ ᠵᠡᠷᠭᠡ ᠮᠤᠷᠢᠳ ᠰᠢᠯᠭᠠᠷᠠᠵᠦ | ᠱᠠᠩ ᠢᠶᠠᠨ ᠲᠤᠰᠤᠭᠰᠠᠨ ᠪᠠᠶᠢᠨᠠ᠃ | ᠤᠪᠤᠭᠠᠨ ᠲᠠᠬᠢᠯᠭᠠ ᠶᠢᠨ ᠦᠶᠡ ᠪᠠᠷ ᠲᠡᠭᠷᠢ ᠰᠠᠬᠢᠭᠤᠰᠤ ᠪᠠᠶᠠᠰᠴᠤ᠂ ᠬᠤᠰᠢᠭᠤ ᠨᠤᠲᠤᠭ ᠤᠨ | ᠬᠡᠪᠴᠢᠶᠠᠨ ᠳᠤ ᠡᠭᠦᠯᠡ ᠪᠤᠷᠤᠭᠠᠨ ᠵᠤᠵᠠᠭᠠᠷᠠᠵᠦ᠂ ᠤᠯᠠᠨ ᠭᠠᠵᠠᠷ ᠬᠤᠷᠠ ᠪᠤᠷᠤᠭᠠᠨ ᠤᠷᠤᠵᠦ᠂ ᠤᠷᠭᠤᠮᠠᠯ | ᠪᠡᠯᠴᠢᠭᠡᠷ ᠠᠮᠢᠯᠠᠨ ᠦᠳᠭᠡᠷᠡᠵᠦ᠂ ᠠᠯᠳᠠᠨ ᠨᠠᠮᠤᠷ ᠤᠨ ᠰᠢᠵᠢᠷ ᠤᠯᠠᠷᠢᠯ ᠳᠤ ᠠᠷᠠᠳ ᠮᠠᠯᠴᠢᠳ ᠤᠨ ᠡᠯᠪᠡᠭ ᠪᠠᠶᠠᠨ | ᠵᠤᠯ ᠵᠢᠷᠭᠠᠯᠳᠤ ᠠᠮᠢᠳᠣᠷᠠᠯ ᠲᠡᠯᠭᠡᠭᠳᠡᠨᠡ᠃ |